క్షణికావేశంలో ఆత్మహత్యలకు పాల్పడొద్దు.. మీ హక్కుల కోసం బీఎస్పీ అండగా ఉంటుంది
యువత చేతిలో బ్రహ్మాస్త్రం ఓటు హక్కు.. సమర్థంగా వినియోగించుకోవాలి
రిపోర్టర్: దామల్ల భాస్కర్
తిరుమలాయపాలెం, ఆగస్టు 5 (నమస్తే న్యూస్)
ఉద్యోగాల నోటిఫికేషన్లు రావడం లేదనే మనస్థాపంతో ఆత్మహత్యాయత్నానికి పాల్పడి చికిత్స పొందుతున్న గడ్డం సతీష్ను బీఎస్పీ పాలేరు నియోజకవర్గ అధ్యక్షులు ఎన్నబోయిన రమేష్ పరామర్శించారు. ఆయన ఆరోగ్య పరిస్థితిని అడిగి తెలుసుకుని, కుటుంబ సభ్యులకు ధైర్యం చెప్పారు.
అనంతరం తిరుమలాయపాలెం మండల కేంద్రంలో ఏర్పాటు చేసిన విలేకరుల సమావేశంలో ఎన్నబోయిన రమేష్ మాట్లాడుతూ, ఉద్యోగాల కోసం ఎదురుచూస్తున్న నిరుద్యోగ యువత ఎట్టి పరిస్థితుల్లోనూ మనస్థాపానికి గురికావద్దని, క్షణికావేశంలో ఆత్మహత్యలకు పాల్పడటం సమస్యలకు పరిష్కారం కాదని సూచించారు. యువత తమ భవిష్యత్తుపై ఆశలు కోల్పోకుండా ధైర్యంగా ముందుకు సాగాలని కోరారు.
నిరుద్యోగ యువత సమస్యలు, ఉద్యోగ నోటిఫికేషన్ల విషయంలో ప్రభుత్వాన్ని ప్రశ్నించేందుకు, తమ హక్కుల సాధన కోసం బీఎస్పీ ఎల్లప్పుడూ యువతకు అండగా ఉంటుందని తెలిపారు.
కాంగ్రెస్ ప్రభుత్వం, ముఖ్యమంత్రి రేవంత్ రెడ్డి నాయకత్వంలోని ప్రభుత్వం బీసీల పట్ల తగిన శ్రద్ధ చూపడం లేదని ఆయన విమర్శించారు. ఎన్నికల సమయంలో మాత్రమే బీసీలు గుర్తుకు వస్తున్నారని, మిగతా సమయంలో వారిని కేవలం ఓటర్లుగానే చూస్తున్నారనే భావన కలుగుతోందని అన్నారు.
బీసీలకు సామాజిక, రాజకీయ, ఆర్థిక రంగాల్లో తగిన ప్రాధాన్యత కల్పించాల్సిన అవసరం ఉందని పేర్కొన్నారు. ఖమ్మం జిల్లాలో ముగ్గురు మంత్రులు ఉన్నప్పటికీ బీసీలకు జరుగుతున్న అన్యాయంపై తగిన స్థాయిలో స్పందించడం లేదని ఆవేదన వ్యక్తం చేశారు. బీసీల సమస్యలను పట్టించుకోకుండా వారి ఓట్లను మాత్రమే ఆశించడం సరికాదని వ్యాఖ్యానించారు.
యువత చేతిలో ఉన్న ఓటు హక్కు ఒక బ్రహ్మాస్త్రం లాంటిదని పేర్కొన్న ఎన్నబోయిన రమేష్, సమయం వచ్చినప్పుడు తమ భవిష్యత్తు, తమ సమస్యలను దృష్టిలో ఉంచుకుని ఓటు హక్కును సద్వినియోగం చేసుకోవాలని పిలుపునిచ్చారు. ప్రజాస్వామ్య పద్ధతిలో తమ తీర్పును గట్టిగా వినిపించాలని యువతకు సూచించారు.
నిరుద్యోగ యువత, బీసీల సమస్యలపై నిరంతరం పోరాడేందుకు బీఎస్పీ సిద్ధంగా ఉందని స్పష్టం చేసిన ఆయన, యువత ఎలాంటి ఆత్మహత్యాయత్నాలకు పాల్పడకుండా సమస్యలను ధైర్యంగా ఎదుర్కొని తమ భవిష్యత్తును నిర్మించుకోవాలని కోరారు.
About The Author
