భాల్యతండ గ్రామ పంచాయితీ సర్పంచ్ కాలునాయక్.
డోర్నకల్/మరిపెడ(జులై 15)నమస్తే న్యూస్.
మహబూబాబాద్ జిల్లా మరిపెడ మండలం బాల్య తండా గ్రామపంచాయతీలో నెలకొన్న వర్షాభావ పరిస్థితులను దృష్టిలో ఉంచుకుని రైతులకు అవగాహన కల్పించేందుకు బుధవారం రోజున ప్రత్యేక సదస్సు నిర్వహించారు. గ్రామ సర్పంచ్ జరుపుల కాలు నాయక్ ఆధ్వర్యంలో జరిగిన ఈ కార్యక్రమంలో ఐబీ అసిస్టెంట్ ఇంజినీర్(ఏఈ)శ్రీకాంత్,వ్యవసాయ విస్తరణ అధికారి(ఏఈవో)వినోద్ పాల్గొని రైతులకు శాస్త్రీయ వ్యవసాయ పద్ధతులు,నీటి సంరక్షణ చర్యలపై విస్తృతంగా అవగాహన కల్పించారు.ఈ సందర్భంగా అధికారులు మాట్లాడుతూ,ఈ ఏడాది వర్షపాతం సాధారణ స్థాయిలో లేకపోవడంతో రైతులు పరిస్థితులను ముందుగానే అంచనా వేసుకుని సాగు ప్రణాళికను రూపొందించుకోవడం అత్యంత అవసరమని పేర్కొన్నారు.అందుబాటులో ఉన్న ప్రతి నీటి వనరును జాగ్రత్తగా వినియోగిస్తూ ఒక్క చుక్క నీరు కూడా వృథా కాకుండా చూసుకోవాలని సూచించారు. చెరువులు,కుంటలు,బోర్లు,వ్యవసాయ బావుల్లోని నీటిని పొదుపుగా వినియోగించడం ద్వారా పంటలను కొంత మేర రక్షించుకోవచ్చని వివరించారు. తక్కువ నీటితో సాగు చేయగల పంటలను ఎంపిక చేసుకోవడం,వాతావరణ పరిస్థితులకు అనుగుణంగా పంటల మార్పిడి చేపట్టడం,నేలలో తేమ నిల్వ ఉండే విధంగా వ్యవసాయ పద్ధతులను అనుసరించడం వల్ల దిగుబడులు మెరుగుపడే అవకాశాలు ఉంటాయని తెలిపారు. పంటల ప్రారంభ దశ నుంచి కోత దశ వరకు తీసుకోవాల్సిన జాగ్రత్తలు,ఎరువుల సమతుల వినియోగం,చీడపీడలు మరియు తెగుళ్ల నివారణకు అనుసరించాల్సిన చర్యలను రైతులకు వివరించారు. వ్యవసాయ శాఖ అధికారులు అందించే సూచనలు,వాతావరణ హెచ్చరికలను ఎప్పటికప్పుడు గమనిస్తూ నిర్ణయాలు తీసుకోవాలని,వర్షాభావ పరిస్థితుల్లో అనవసర పెట్టుబడులు పెట్టకుండా శాస్త్రీయ సలహాలతోనే సాగు చేపట్టాలని రైతులకు సూచించారు. ప్రభుత్వ వ్యవసాయ శాఖ అందిస్తున్న పథకాలు,సాంకేతిక సేవలను సద్వినియోగం చేసుకోవాలని కోరారు. సర్పంచ్ జరుపుల కాలు నాయక్ మాట్లాడుతూ, రైతులు ఇబ్బందులు ఎదుర్కొనే సమయంలో వారికి అవసరమైన అవగాహన కల్పించడం గ్రామపంచాయతీ బాధ్యతగా భావిస్తున్నామని అన్నారు. వర్షాభావ పరిస్థితుల్లో రైతులు ధైర్యం కోల్పోకుండా అధికారులు సూచించిన విధంగా సాగు చేపట్టాలని కోరారు.గ్రామంలో రైతులకు అవసరమైన సమాచారాన్ని ఎప్పటికప్పుడు అందిస్తూ,వ్యవసాయ శాఖతో సమన్వయం చేసి మరిన్ని అవగాహన కార్యక్రమాలు నిర్వహిస్తామని తెలిపారు.రైతులు కూడా అధికారులను పలు సందేహాలు అడిగి నివృత్తి చేసుకున్నారు.గ్రామంలో నీటి కొరత పరిస్థితుల్లో అనుసరించాల్సిన ప్రత్యామ్నాయ వ్యవసాయ పద్ధతులపై అధికారులు రైతులకు పలు సూచనలు చేశారు.ఈ అవగాహన సదస్సు రైతులకు ఎంతో ఉపయోగకరంగా నిలిచిందని పలువురు రైతులు అభిప్రాయం వ్యక్తం చేశారు.ఈ కార్యక్రమంలో గ్రామ రైతులు,ప్రజాప్రతినిధులు,వ్యవసాయ శాఖ సిబ్బంది,గ్రామ పెద్దలు తదితరులు పాల్గొన్నారు…
About The Author
