ప్రభుత్వ కార్యాలయంలో వ్యక్తిగత కార్యక్రమాలా అంటూ ప్రజల విమర్శలు
తిరుమలాయపాలెం మండలం లోని సుబ్లేడు గ్రామపంచాయతీ కార్యాలయంలో గ్రామ సర్పంచ్ సాంగబత్తుల స్వాతి భర్త సాంగబత్తుల సుమన్ రెడ్డి జన్మదిన వేడుకలు నిర్వహించడం వివాదాస్పదంగా మారింది.
గ్రామపంచాయతీకి సంబంధించిన ప్రభుత్వ కార్యాలయంలో వ్యక్తిగత జన్మదిన వేడుకలు నిర్వహించడం పట్ల బీఆర్ఎస్ మండల నాయకులు కీసర సంకీర్త్ రెడ్డి అభ్యంతరం వ్యక్తం చేశారు. ప్రభుత్వ కార్యాలయాలు ప్రజా పరిపాలనకు సంబంధించిన కార్యక్రమాల కోసం ఉండాలని, వ్యక్తిగత వేడుకలకు వాటిని వినియోగించడం సమంజసం కాదని ఆయన పేర్కొన్నారు.
ఈ సందర్భంగా కీసర సంకీర్త్ రెడ్డి మాట్లాడుతూ.. ప్రభుత్వానికి సంబంధించిన గ్రామపంచాయతీ కార్యాలయంలో ప్రభుత్వ కార్యకలాపాలతో సంబంధం లేని వ్యక్తిగత కార్యక్రమాలు నిర్వహించడం ఏమిటని ప్రశ్నించారు. ప్రజల కోసం పనిచేయాల్సిన ప్రభుత్వ కార్యాలయాలను వ్యక్తిగత కార్యక్రమాలకు వేదికలుగా ఉపయోగించడంపై సంబంధిత అధికారులు దృష్టి సారించాల్సిన అవసరం ఉందన్నారు.
ప్రభుత్వ కార్యాలయాల వినియోగానికి సంబంధించిన నిబంధనలను అధికారులు పరిశీలించి, ఈ ఘటనపై పూర్తి స్థాయిలో విచారణ జరిపించాలని ఆయన కోరారు. నిబంధనలు ఉల్లంఘించినట్లు తేలితే బాధ్యులపై తగిన చర్యలు తీసుకోవాలని డిమాండ్ చేశారు.
ఉన్నతాధికారులు స్పందించాలి
సుబ్లేడు గ్రామపంచాయతీ కార్యాలయంలో జరిగిన ఈ కార్యక్రమంపై సంబంధిత ఉన్నతాధికారులు తక్షణమే స్పందించి వాస్తవాలను పరిశీలించాలని బీఆర్ఎస్ నాయకులు కోరుతున్నారు. ప్రభుత్వ కార్యాలయాల వినియోగంపై స్పష్టమైన మార్గదర్శకాలు అమలు చేయాలని, భవిష్యత్తులో ఇలాంటి ఘటనలు పునరావృతం కాకుండా చర్యలు తీసుకోవాలని డిమాండ్ చేశారు.
About The Author
