అవాంఛనీయ ఘటనలకు తావులేకుండా ముందస్తు ప్రణాళికతో విధులు
పెండింగ్ కేసుల పరిష్కారంపై ప్రత్యేక దృష్టి సారించాలి: ఎస్పీ డాక్టర్ శబరీష్
మహబూబాబాద్, సెప్టెంబర్ 10 (నమస్తే న్యూస్)
రానున్న గణేష్ నవరాత్రి ఉత్సవాలను ప్రశాంత వాతావరణంలో నిర్వహించేందుకు పటిష్టమైన భద్రతా చర్యలతో సిద్ధంగా ఉండాలని మహబూబాబాద్ జిల్లా ఎస్పీ డాక్టర్ శబరీష్ పోలీసు అధికారులను ఆదేశించారు. గురువారం మహబూబాబాద్ టౌన్ పోలీస్ స్టేషన్ కాన్ఫరెన్స్ హాల్లో జిల్లాలోని డీఎస్పీలు, సీఐలు, ఎస్ఐలతో ఎస్పీ నేర సమీక్ష సమావేశం నిర్వహించారు.ఈ సందర్భంగా గణేష్ విగ్రహాల ఏర్పాటు, నవరాత్రి ఉత్సవాలు, నిమజ్జన కార్యక్రమాల సమయంలో చేపట్టాల్సిన భద్రతా ఏర్పాట్లపై అధికారులతో సమీక్షించారు. ఎలాంటి అవాంఛనీయ ఘటనలకు తావులేకుండా ముందస్తు ప్రణాళికతో బందోబస్తు, ట్రాఫిక్ నియంత్రణ, నిమజ్జన మార్గాల పర్యవేక్షణ తదితర అంశాలపై ప్రత్యేక దృష్టి సారించాలని సూచించారు.అదేవిధంగా జిల్లాలో నేరాల నియంత్రణకు పటిష్ట చర్యలు చేపట్టాలని ఎస్పీ ఆదేశించారు. నమోదైన కేసుల దర్యాప్తును వేగవంతం చేసి, పెండింగ్ కేసుల పరిష్కారానికి ప్రత్యేక కార్యాచరణ రూపొందించాలని సూచించారు. పోలీసింగ్లో సాంకేతిక పరిజ్ఞానాన్ని సమర్థవంతంగా వినియోగించుకుంటూ నేరాల నియంత్రణకు మరింత పకడ్బందీగా పనిచేయాలని అధికారులకు దిశానిర్దేశం చేశారు.గణేష్ ఉత్సవాల సమయంలో ప్రజలకు ఎలాంటి ఇబ్బందులు కలగకుండా అన్ని శాఖలతో సమన్వయం చేసుకుంటూ విధులు నిర్వహించాలని, శాంతిభద్రతలకు విఘాతం కలిగించే పరిస్థితులను ముందుగానే గుర్తించి నివారించాలని ఎస్పీ డాక్టర్ శబరీష్ స్పష్టం చేశారు.
About The Author
