పాశ్చాత్య ధోరణి వీడి సనాతన సంప్రదాయం వైపు అడుగులు
రిపోర్టర్ దామల్ల భాస్కర్
తిరుమలాయపాలెం ఆగస్టు 31 (నమస్తే న్యూస్ )
ఆధునిక పోకడల వైపు పరుగులు తీస్తున్న నేటి తరం పిల్లలకు సనాతన సంస్కృతీ సంప్రదాయాలను ఎలా అందించాలో ఒక చిన్నారి ప్రాక్టికల్గా నిరూపించి చూపించింది. పవిత్ర శ్రావణమాస పూజల సందర్భంగా తిరుమలాయపాలెం మండల పరిధిలోని ఎర్రగడ్డ గ్రామంలో ఒక అద్భుతమైన ఆధ్యాత్మిక దృశ్యం ఆవిష్కృతమైంది. తిరుమలాయపాలెం ఎమ్మార్పీఎస్ మండల అధ్యక్షుడు గోవింద సురేష్ కుమార్తె, 9 సంవత్సరాల చిన్నారి అత్యంత భిన్న వయసులోనే తన స్వగ్రామమైన ఎర్రగడ్డలోని శ్రీ ముత్యాలమ్మ అమ్మవారికి భక్తిశ్రద్ధలతో బోనం ఎత్తుకుని మొక్కులు చెల్లించుకుంది.
స్మార్ట్ ఫోన్లు, ల్యాప్టాప్ల సంస్కృతికి అలవాటు పడి పండుగలు, ఆచారాలకు నేటి తరం పిల్లలు దూరమవుతున్న తరుణంలో.. ఈ 9 ఏళ్ల బాలిక సాంప్రదాయ దుస్తులు ధరించి, ఎంతో నిష్ఠతో బోనాన్ని నెత్తిన పెట్టుకుని అమ్మవారి ఆలయానికి నడచివచ్చిన తీరు ఆసక్తికరంగా నిలిచింది. పసి మనసులోనే భక్తి భావాన్ని నింపుకుని, పెద్దలు సైతం ఆశ్చర్యపోయేలా ఆ చిన్నారి ప్రదర్శించిన క్రమశిక్షణ శ్రావణమాస పవిత్రతను మరింత పెంచింది.
కేవలం చదువు, ర్యాంకులు మాత్రమే కాకుండా చిన్నతనం నుంచే పిల్లలకు ఇటువంటి ఆధ్యాత్మిక విలువలు, నైతిక ప్రవర్తనను అలవర్చడం తల్లిదండ్రులుగా, పెద్దలుగా మన అందరి ప్రాథమిక బాధ్యత అని ఈ సంఘటన గుర్తు చేస్తోంది. గోవింద సురేష్ దంపతులు తమ కుమార్తెకు చిన్న వయసులోనే మన మూలాలను, ఆచారాల విశిష్టతను నేర్పించి ఆదర్శంగా నిలిచారు. రేపు పాఠశాల పునఃప్రారంభం కాగానే.. చదువుతో పాటు సమాజానికి, సంస్కృతికి విలువ ఇచ్చే ఈ చిన్నారి సంస్కారవంతమైన నడవడికను చూసి గురువులు సైతం సగర్వంగా మెచ్చుకునేలా ఈ అడుగులు ఉన్నాయి. భావితరాలకు మన గొప్ప సంస్కృతిని సగర్వంగా అందించే ఈ ‘చిన్నారి బోనం’ కథనం నేటి సమాజానికి ఒక మంచి సందేశం.
About The Author
