ఎపూర్ గ్రామంలో మానవత్వం చాటుకున్న పోలీస్ కానిస్టేబుల్
గూడూరు, ఆగస్టు 26 (నమస్తే న్యూస్):
ఆపదలో ఉన్న ఓ దివ్యాంగ యువతిని తన ప్రాణాలను సైతం లెక్కచేయకుండా రక్షించి కానిస్టేబుల్ దిలీప్ మానవత్వాన్ని చాటుకున్నారు. మహబూబాబాద్ జిల్లా గూడూరు మండలం ఎపూర్ గ్రామంలో ఈ ఘటన చోటుచేసుకుంది.స్థానికుల కథనం ప్రకారం.. గ్రామానికి చెందిన ఓ దివ్యాంగ యువతి ప్రమాదవశాత్తు చేతిబావిలో పడిపోయింది. బావిలో లోతుగా పడిపోయి బయటకు రాలేని పరిస్థితిలో ఆమె సహాయం కోసం ప్రయత్నిస్తోంది. అదే సమయంలో అటుగా వెళ్తున్న కానిస్టేబుల్ దిలీప్కు విషయం తెలియడంతో వెంటనే అక్కడికి చేరుకున్నారు.పరిస్థితిని గమనించిన దిలీప్ ఏమాత్రం ఆలస్యం చేయకుండా యువతిని రక్షించేందుకు బావిలోకి దిగారు. ప్రాణాలకు ప్రమాదం ఉన్నప్పటికీ ఏమాత్రం వెనుకడుగు వేయకుండా ధైర్యసాహసాలు ప్రదర్శించారు. బావిలో లోతుగా ఉన్న యువతి వద్దకు చేరుకుని, స్థానికుల సహాయంతో తాళ్లను ఉపయోగించి ఆమెను సురక్షితంగా బయటకు తీసుకొచ్చారు.సకాలంలో స్పందించి చాకచక్యంగా వ్యవహరించడంతో యువతి ప్రాణాలతో బయటపడింది. ఘటన సమయంలో కానిస్టేబుల్ దిలీప్ చూపిన సమయస్ఫూర్తి, ధైర్యం, సేవాభావం గ్రామస్థులను ఆకట్టుకుంది. ఆపదలో ఉన్న వ్యక్తిని రక్షించేందుకు తన ప్రాణాలను సైతం లెక్కచేయకుండా ముందుకు వచ్చిన దిలీప్ను గ్రామస్థులు అభినందించారు.పోలీసు అంటే కేవలం విధులు నిర్వర్తించడం మాత్రమే కాదు.. ఆపదలో ఉన్న ప్రజలకు అండగా నిలిచి, వారి ప్రాణాలను కాపాడేందుకు ముందుకు రావడం కూడా బాధ్యతే” అంటూ గ్రామస్థులు కానిస్టేబుల్ దిలీప్ను ప్రశంసించారు.ఈ ఘటనతో పోలీసుల పట్ల ప్రజల్లో మరింత నమ్మకం పెరిగిందని స్థానికులు పేర్కొన్నారు.
About The Author
