లక్షలు చెల్లించినా అభివృద్ధి పనులు శూన్యం
హామీలు నెరవేర్చలేదని బాధితుల ఆరోపణ
నిర్వాహకుడిపై చర్యలు తీసుకోవాలని డిమాండ్
డోర్నకల్/మరిపెడ, ఆగస్టు 13 (నమస్తే న్యూస్):
జీవితకాలం కష్టపడి కూడబెట్టిన డబ్బుతో ప్లాటు కొనుగోలు చేస్తే భవిష్యత్తుకు భరోసాగా ఉంటుందని భావించిన కుటుంబాలకు చేదు అనుభవం ఎదురైందని బాధితులు ఆవేదన వ్యక్తం చేశారు. ఆకర్షణీయమైన హామీలతో ప్లాట్లు విక్రయించి, అనంతరం కనీస అభివృద్ధి పనులు కూడా చేపట్టలేదని ఆరోపించారు.
మహబూబాబాద్ జిల్లా మరిపెడ మండలం అబ్బాయిపాలెం గ్రామ పంచాయతీ పరిధిలోని గ్రీన్సిటీ వెంచర్లో ప్లాట్లు కొనుగోలు చేసిన బాధితులు గురువారం మీడియా సమావేశం నిర్వహించి తమ గోడును వెల్లడించారు. సుమారు పదేళ్ల క్రితం వెంచర్ నిర్వాహకుడు చుండ్రు రాజ్కుమార్ ఆకర్షణీయమైన బ్రోచర్లు, లేఅవుట్ మ్యాప్లు చూపించి ప్లాట్లు విక్రయించారని వారు తెలిపారు.
హామీలు ఎన్నో.. పనులు శూన్యం
వెంచర్ చుట్టూ ప్రహరీ నిర్మాణం, చిల్డ్రన్ పార్క్, ప్రతి వీధిలో విద్యుత్ దీపాలు, విద్యుత్ సౌకర్యం, ప్రతి ప్లాటుకు మంచినీటి కనెక్షన్ వంటి సదుపాయాలు కల్పిస్తామని అప్పట్లో హామీ ఇచ్చారని బాధితులు పేర్కొన్నారు. అయితే ప్లాట్లకు సంబంధించిన మొత్తాన్ని పూర్తిగా చెల్లించిన తర్వాత కూడా హామీ ఇచ్చిన మేరకు అభివృద్ధి పనులు చేపట్టలేదని ఆరోపించారు.వెంచర్లో ప్రస్తుతం రోడ్లు, డ్రైనేజీ, ఇతర మౌలిక సదుపాయాలు లేకపోవడంతో ప్లాట్ల యజమానులు తీవ్ర ఇబ్బందులు ఎదుర్కొంటున్నారని తెలిపారు. ఇల్లు నిర్మించుకోవాలన్నా, ప్లాటు విక్రయించాలన్నా పరిస్థితులు అనుకూలంగా లేవని వాపోయారు.
రిజిస్ట్రేషన్లపైనా ఆరోపణలు
కొంతమంది ప్లాట్ల కొనుగోలుదారులకు డబ్బులు పూర్తిగా చెల్లించినప్పటికీ రిజిస్ట్రేషన్ ప్రక్రియ కూడా పూర్తికాలేదని బాధితులు ఆరోపించారు. తమ సమస్యలను పరిష్కరించాలని పలుమార్లు ప్రయత్నించినా స్పందన సరిగా లేదని తెలిపారు. ఫోన్లో సంప్రదించినా సమాధానం ఇవ్వడం లేదని, అడిగితే బాధ్యతారాహిత్యంగా మాట్లాడుతున్నారని ఆరోపించారు.
అధికారులకు బాధితుల విజ్ఞప్తి
భూమిపై పెట్టుబడి పెడితే భవిష్యత్తులో లాభం ఉంటుందనే నమ్మకంతో డబ్బులు పెట్టామని, ఇప్పుడు ఆ పెట్టుబడి తమకు భారంగా మారిందని బాధితులు కన్నీటి పర్యంతమయ్యారు. వెంచర్ నిర్వాహకుడిపై సమగ్ర విచారణ జరిపి, చట్టపరమైన చర్యలు తీసుకోవాలని డిమాండ్ చేశారు.అలాగే తమకు ఇచ్చిన హామీల మేరకు మౌలిక సదుపాయాలు కల్పించేలా చర్యలు తీసుకోవాలని, రిజిస్ట్రేషన్ సమస్యలను పరిష్కరించి తమకు న్యాయం చేయాలని ప్రభుత్వాన్ని, సంబంధిత అధికారులను కోరారు.
బాధితులు
కేలోత్ భిక్షపతి, కేలోత్ లచ్చిరాం, మాలోత్ ప్రతాప్ సింగ్, మాలోత్ కిరణ్, బోడ వెంకన్న, చాపల సుభద్ర, మిడ్తపల్లి నరసింహారావు, గండు మల్లయ్య తదితరులు తమకు న్యాయం చేయాలని కోరారు.బాధితుల ఆరోపణలపై వెంచర్ నిర్వాహకుడు చుండ్రు రాజ్కుమార్ వివరణ అందాల్సి ఉంది.
k
97
About The Author
