లక్షకు రూ.3 వేలు వసూలు చేస్తున్నారంటూ ఆరోపణలు
నర్సింహులపేట, ఆగస్టు 9 (నమస్తే న్యూస్):
మహబూబాబాద్ జిల్లా నర్సింహులపేట మండలం కొమ్ములవంచ గ్రామంలో మహిళా సంఘాలను ఆసరాగా చేసుకుని రుణాల మంజూరు పేరుతో అక్రమ వసూళ్లకు పాల్పడుతున్నారనే ఆరోపణలు వినిపిస్తున్నాయి. మహిళా సంఘాలకు రుణాలు మంజూరు చేసే విషయంలో ఓ సీఏ (కమ్యూనిటీ ఆర్గనైజర్) వ్యవహారశైలిపై పలువురు మహిళలు తీవ్ర అసంతృప్తి వ్యక్తం చేస్తున్నట్లు సమాచారం.ఒక గ్రూపునకు రుణం మంజూరు చేయించేందుకు లక్ష రూపాయలకు రూ.3 వేల చొప్పున కమీషన్ వసూలు చేస్తున్నారనే ఆరోపణలు వెల్లువెత్తుతున్నాయి. రుణం కోసం ఎదురుచూస్తున్న మహిళా సంఘాల బలహీనతను ఆసరాగా చేసుకుని డబ్బులు వసూలు చేస్తున్నారనే విమర్శలు వినిపిస్తున్నాయి.మహిళలను ఆర్థికంగా బలోపేతం చేయడం, స్వయం ఉపాధి అవకాశాలు కల్పించడం, కుటుంబాల ఆర్థిక పరిస్థితిని మెరుగుపరచడం లక్ష్యంగా ప్రభుత్వం మహిళా సంఘాలకు వివిధ రకాల రుణ సదుపాయాలు కల్పిస్తోంది. అయితే, ఇలాంటి పథకాల అమలులో మధ్యవర్తుల పేరుతో అక్రమ వసూళ్లు జరిగితే అసలు లక్ష్యమే నీరుగారిపోతుందని మహిళా సంఘాల సభ్యులు ఆవేదన వ్యక్తం చేస్తున్నారు.‘రుణం కావాలంటే కమీషన్ ఇవ్వాల్సిందేనా?’ అంటూ మహిళా సంఘాల సభ్యులు ప్రశ్నిస్తున్నారు. నిజంగా రుణాల మంజూరుకు సంబంధించి ఎలాంటి కమీషన్ వసూలు చేస్తున్నారా? అనే అంశంపై సంబంధిత ఉన్నతాధికారులు సమగ్ర విచారణ చేపట్టి వాస్తవాలను వెలుగులోకి తేవాలని వారు కోరుతున్నారు.ప్రభుత్వం మహిళా సంఘాల కోసం అందిస్తున్న నిధులు, రుణాలు పూర్తిస్థాయిలో లబ్ధిదారులకు చేరేలా అధికారులు పర్యవేక్షణను కట్టుదిట్టం చేయాలని, అక్రమ వసూళ్లు నిజమని తేలితే బాధ్యులపై కఠిన చర్యలు తీసుకోవాలని మహిళా సంఘాల సభ్యులు డిమాండ్ చేస్తున్నారు.అధికారుల విచారణతోనే నిజానిజాలు వెలుగులోకి రావాల్సి ఉంది.?
About The Author
