ప్రజా సమస్యల పరిష్కారానికి న్యాయవాదులు కృషి చేయాలి
టీ జేఏసీ జిల్లా చైర్మన్ మందాడి ఇజ్రాయిల్
తిరుమలాయపాలెం అక్టోబర్ 4 (నమస్తే న్యూస్)
ఆల్ ఇండియా లాయర్స్ అసోసియేషన్ ఖమ్మం జిల్లా నూతన అధ్యక్ష, కార్యదర్శులుగా బాధ్యతలు స్వీకరించిన టెంకటి వెంకటేశ్వర్లు, మీసాల వెంకటేశ్వర్లును తెలంగాణ జాయింట్ యాక్షన్ కమిటీ (టీ జేఏసీ) ఖమ్మం జిల్లా చైర్మన్ మందాడి ఇజ్రాయిల్ ఘనంగా సన్మానించి అభినందించారు.
మధిర పట్టణంలో నిర్వహించిన ఆల్ ఇండియా లాయర్స్ అసోసియేషన్ ఖమ్మం జిల్లా మహాసభల్లో నూతన జిల్లా అధ్యక్ష, కార్యదర్శులుగా టెంకటి వెంకటేశ్వర్లు, మీసాల వెంకటేశ్వర్లు బాధ్యతలు స్వీకరించారు. ఈ సందర్భంగా నూతన బాధ్యతలు చేపట్టిన వారిని మందాడి ఇజ్రాయిల్ శాలువాతో సత్కరించి శుభాకాంక్షలు తెలిపారు.
ప్రజా సమస్యల పరిష్కారానికి కృషి చేయాలి
ఈ సందర్భంగా మందాడి ఇజ్రాయిల్ మాట్లాడుతూ.. న్యాయవాదులు సమాజంలో కీలకమైన బాధ్యతను నిర్వర్తిస్తున్నారని అన్నారు. నూతనంగా బాధ్యతలు చేపట్టిన అధ్యక్ష, కార్యదర్శులు ప్రజా సమస్యల పరిష్కారానికి, కార్మికులు, ఉద్యోగుల హక్కుల పరిరక్షణకు నిరంతరం కృషి చేయాలని ఆకాంక్షించారు.
న్యాయపరమైన అంశాలపై ప్రజలకు అవగాహన కల్పిస్తూ, హక్కుల పరిరక్షణలో న్యాయవాదులు ముందుండాలని సూచించారు. నూతన నాయకత్వంలో ఆల్ ఇండియా లాయర్స్ అసోసియేషన్ ఖమ్మం జిల్లా మరింత బలోపేతం కావాలని ఆకాంక్షించారు.
మందాడి ఇజ్రాయిల్‌కు కృతజ్ఞతలు
తమను ఘనంగా సన్మానించి అభినందించిన టీ జేఏసీ ఖమ్మం జిల్లా చైర్మన్ మందాడి ఇజ్రాయిల్‌కు నూతన అధ్యక్ష, కార్యదర్శులు టెంకటి వెంకటేశ్వర్లు, మీసాల వెంకటేశ్వర్లు కృతజ్ఞతలు తెలిపారు. సంఘం బలోపేతానికి, ప్రజా సమస్యల పరిష్కారానికి తమ వంతు కృషి చేస్తామని పేర్కొన్నారు.
ఈ కార్యక్రమంలో ప్రగతిశీల యువజన సంఘం (PYL) ఖమ్మం జిల్లా ప్రధాన కార్యదర్శి గొర్రెపాటి రమేష్, లాయర్ ఉమ్మడి సతీష్ తదితరులు పాల్గొని నూతన అధ్యక్ష, కార్యదర్శులను అభినందించారు.
About The Author
