ఆధార్లో పుట్టిన తేదీ మార్పులు చేస్తే చర్యలు తప్పవు
బాల్య వివాహాల నిరోధక చట్టం–2006 ప్రకారం సహకరించిన వారందరూ శిక్షార్హులే
వయసు నిర్ధారణకు ఆధార్ ప్రామాణికం కాదు.. పుట్టిన తేదీ, స్టడీ సర్టిఫికెట్లే కీలకం
మహబూబాబాద్, ఆగస్టు 19 (నమస్తే న్యూస్ డెస్క్):
బాల్య వివాహాలను ప్రోత్సహించేలా వ్యవహరించినా, బాలికల వయసును మార్చి చూపించేందుకు సహకరించినా కఠిన చర్యలు తప్పవని ఈడీఎం యుగంధర్ హెచ్చరించారు. బాల్య వివాహాల నిరోధంలో ప్రతి ఒక్కరూ భాగస్వాములు కావాలని సూచించారు. జిల్లా బాలల పరిరక్షణ విభాగం ఆధ్వర్యంలో జిల్లా కలెక్టరేట్లో జిల్లాలోని మీసేవ నిర్వాహకులకు బాల్య వివాహాల నిరోధక చట్టంపై అవగాహన కార్యక్రమం నిర్వహించారు. ఈ సందర్భంగా బాల్య వివాహాలను అడ్డుకోవడంలో మీసేవ నిర్వాహకుల పాత్ర, వయసు ధ్రువీకరణకు సంబంధించిన అంశాలపై అవగాహన కల్పించారు.
ఆధార్లో వయసు మార్పులు చేస్తే చర్యలు
ఈ కార్యక్రమంలో ఈడీఎం యుగంధర్ మాట్లాడుతూ.. జిల్లాలో కొందరు తల్లిదండ్రులు, మధ్యవర్తుల సహాయంతో బాల్య వివాహాలకు పాల్పడుతున్నట్లు తమ దృష్టికి వచ్చిందన్నారు. ఇందుకోసం కొంతమంది మీసేవ నిర్వాహకుల సహకారంతో ఆధార్ కార్డుల్లో పుట్టిన తేదీలను మార్చే ప్రయత్నాలు జరుగుతున్నట్లు సమాచారం ఉందన్నారు. బాల్య వివాహాలకు సహకరించేలా ఆధార్ కార్డుల్లో పుట్టిన తేదీ మార్పులు చేసే వారిపై కఠిన చర్యలు తీసుకుంటామని హెచ్చరించారు. బాల్య వివాహాలు జరగకుండా అడ్డుకోవాల్సిన బాధ్యత ప్రతి ఒక్కరిపైనా ఉందన్నారు.
ఆధార్ ప్రామాణికం కాదు
జిల్లా బాలల పరిరక్షణ అధికారి కమలాకర్ మాట్లాడుతూ.. జిల్లాలో బాల్య వివాహాల ఘటనలు అధికంగా ఉన్నాయని తెలిపారు. కొంతమంది తల్లిదండ్రులు పిల్లలు చదువుకున్నప్పటికీ చదువుకోలేదని చూపించడం, ఆధార్ కార్డుల్లో పుట్టిన తేదీలను మార్చి 18 సంవత్సరాలు నిండినట్లు చూపించడం ద్వారా బాల్య వివాహాలకు ప్రయత్నిస్తున్నారని పేర్కొన్నారు. ఇలాంటి వ్యవహారాలకు గ్రామస్థాయి నుంచి, మీసేవ కేంద్రాల నుంచి సహకారం అందుతున్నట్లు తమ దృష్టికి వస్తోందన్నారు. ఎవరైనా బాల్య వివాహాలకు ప్రత్యక్షంగా లేదా పరోక్షంగా సహకరిస్తే వారిపై కఠిన చర్యలు తీసుకుంటామని స్పష్టం చేశారు.
సహకరించిన వారూ శిక్షార్హులే
బాల్య వివాహాల నిరోధక చట్టం–2006 ప్రకారం బాల్య వివాహానికి సహకరించే ప్రతి ఒక్కరూ శిక్షకు అర్హులేనని కమలాకర్ తెలిపారు. బాల్య వివాహాలను నిర్వహించే వారితో పాటు అందుకు సహకరించే వారు కూడా చట్టపరమైన చర్యలు ఎదుర్కోవాల్సి ఉంటుందని హెచ్చరించారు.వయసు నిర్ధారణకు ఆధార్ కార్డు ఒక్కటే ప్రామాణిక పత్రం కాదని, పుట్టిన తేదీ సర్టిఫికెట్ లేదా స్టడీ సర్టిఫికెట్ వంటి ధ్రువపత్రాలను పరిశీలించాల్సి ఉంటుందని తెలిపారు.
గ్రామస్థాయిలో బాల్య వివాహాలపై ప్రజలకు అవగాహన కల్పించాలి
బాల్య వివాహాల వల్ల బాలికల విద్య, ఆరోగ్యం, భవిష్యత్తుపై తీవ్ర ప్రభావం పడే అవకాశం ఉందని అధికారులు పేర్కొన్నారు. గ్రామస్థాయిలో బాల్య వివాహాలపై ప్రజలకు మరింత అవగాహన కల్పించడంతో పాటు, అనుమానాస్పద ఘటనలు కనిపించిన వెంటనే సంబంధిత అధికారులకు సమాచారం అందించాలని సూచించారు.ఈ కార్యక్రమంలో బాలల సంరక్షణ అధికారి నరేష్, జిల్లా మహిళా సాధికారత కేంద్రం కోఆర్డినేటర్ మహేశ్వరి, జెండర్ స్పెషలిస్ట్ అరుణ, మీసేవ ప్రతినిధులు పాల్గొన్నారు.
About The Author
